منتدى ابناء قبيلة الشكريه


منتدى للتواصل بين ابناءالقبيله سجل واترك بصمتك
 
الرئيسيةاليوميةس .و .جبحـثالمجموعاتالتسجيلدخول
المواضيع الأخيرة
» جميلة جمال الجيل جمله جالية جمالو# وجيدك يا شكرية أجود من جيد جيد جدي العسير في مالو
الجمعة أكتوبر 17, 2014 6:12 pm من طرف محمد أبو مسعود الاعوالي

» تناول بطون الشكرية بالتفصيل
الجمعة أكتوبر 17, 2014 6:08 pm من طرف محمد أبو مسعود الاعوالي

» عمارة التاي (الهدام)
الخميس أكتوبر 02, 2014 2:57 am من طرف عماد الدين سنهوري

» تحية رمضانية
الأحد يوليو 13, 2014 5:43 am من طرف جعفر زيدان عثمان

» دعوه للتعارف اترك تلفونك
الخميس مارس 13, 2014 4:31 am من طرف يوسف كيكل

» ملامح من اعمال شاعر البطانة ام هبج فى محاولة تحتاج لكثير من التوثيق والمراجع
الإثنين ديسمبر 23, 2013 3:31 am من طرف أحمد التاي العوض

» هلاك القري
الثلاثاء نوفمبر 26, 2013 10:05 am من طرف الصادق احمد عمارة

» رقابة الله عزوجل
الإثنين نوفمبر 25, 2013 4:42 pm من طرف الصادق احمد عمارة

» حقيقة مسرحية المك نمرللعبادي
الجمعة نوفمبر 22, 2013 3:24 am من طرف الصادق احمد عمارة

ازرار التصفُّح
 البوابة
 الرئيسية
 قائمة الاعضاء
 البيانات الشخصية
 س .و .ج
 بحـث
شاطر | 
 

 ملامح من اعمال شاعر البطانة ام هبج فى محاولة تحتاج لكثير من التوثيق والمراجع

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
ود تالعز
عضو فعال
عضو فعال


عدد المساهمات: 29
تاريخ التسجيل: 06/02/2011
الموقع: المملكة العربية السعودية-المنطقة الجنوبية

مُساهمةموضوع: ملامح من اعمال شاعر البطانة ام هبج فى محاولة تحتاج لكثير من التوثيق والمراجع   الأحد يونيو 05, 2011 11:06 am

هذه ملامح من اعمال الشاعر المرحوم ود شعيت فى محاور عدة على راسها :
1. البطانة (ام هبج)
2. الغزل
3. مجالس الجبنة
قال ود شعيت في ام هبج:
ياام هبج اللواري قطعت فسحانك
الموت عزتك لكن زمانك خانك
يوم اتكشفت عنيبه اتدافرت فرسانك
شقوا وبردوك ومركوها اركانك
===========================
يا أُمْ هَبـجْ الهواك شَفــخانةْ المَرّضانْ
وتَاريـخِكْ بِعرفوا السِمِعـو بي حَسَّانْ
كـان أَهلِكْ قِبيلْ ما بَـرَّدو بي الْجِركَانْ
وسَيفْ الزَّايَلهْ كَاكُومْ وأبو عَليّ وحَسَّانْ
زمن دابيك بكر علي صيحة الحيران
تشهدلك عنيبة محدرين فرسان
صبغه يوت ترابك للجروحو مكان
وشاشاتك تبر مهو العلو الشربان
درباتك مغزية من دموم فرسان
عنابرا المهاوي والضهور بيبان
مفاتيحن مراتب فوقن الشجعان
شاشاتك من مهوي تبر اب علو اب كيعان
لحافاتك نضاف ما فهن الوسخان
ملاياتك تبر واب لبلب اب كعان
هواك حقن الملاريا سلفك الريحان
كتير الضايق فيك نومة الكيعان
ما كان الحكيم باشا ابزبد عدلان
دكتور ود كسيبة بشرح المرضان
زمن بحر اب زبد بستورد الحقان
العملية بي سلحاتا عن حسان
عماره بقطع القلب بعالج المصران
غياراتو القرض وب لبلب اب كعان
ان غرق الجرح بخافو من عفنان
بدقولو البصل بملوهو ذي ما كان
بربطولو المهادات بضبحولو سمان
الكرتينة بيت البلزم المرضان
==========================================
و من روائع المرحوم الشاعر عبد الكريم ود شعيت أن تغني للعايدية والجنة وعزيزه أخت الجنة الأصغر والصفا في بريده وكانن في فترة من الفترات ألهمن قريحة شعراء البطانة أن قالوا فيهن أروع أنواع الغزل والمدح وشبهن بالحكومات كل واحده تاخد زمنا وتجي غيرها هذا الشعر الجميل الرائع دار محوره في منطقة ريفي تمبول في منطقة بريده وود أب شام والحريم الغنى فوقن ودشعيت في زمنن كانن أجمل جميلات الشرق وزاروهن كبار الشعراء وتغنوبهم ولكن غنا ود شعيت كان متفرد أن شبهن بالحكومات و هذا الشعر علي لسانه من شريط مسجل له وهو كان يمتدح العايدية ويقول فيها:

بت العايدي جيل البادية والحلال
مسماه أم ختيم وفرعتين وخلال
درعات عنز الريل الخريفن طال
خمسين كهربتا ومنها الشوف زال
حاكمة الدولة بت العايدي ماشه عدلها
تابعاها النظارات ما في من قبلها
قال : ليه ؟؟
قتلو في الربوبه البقودها عدلها
من ما شفتها النوم عيني مازولها
أحمد قولي شوف لي في البلد ظبات
من الناصلة تابعة نظارة الخلوات
بت العايدي صحبي وأمشي للتومات
العاصيات بطيعن قوة مجبورات
ناس أمنه وبتول حويتن السادات
سبايك التبر الفوق النحاس عارضات
تمومة الجرتق الأن والزمان الفات
إعيش راس المربي الطاف جبل عرفات

هذا الكلام في العايدية

وبعد فتره واحده يقال لها الجنه عزمتو جبنه وجاء وجلس معاها وجلسة القهوه معروفه ولها طقوسها العجيبه يعني قعدة جبنه عند شعراء البطانه ويتجادعون بأبيات الشعر والدوبيت كما سيرد لاحقا في ما نظمه عن قهوة وزنين المنسوبة له
وجاء شاعرنا عند الجنه شرب الجبنه وإتكيف كيف كان دنقر إندفق وهنا تجلت قريحته الشعريه وقال في الجنه :

أكان قسم النظارة مكونا العايديه
قامت الجنه سبعين تاخدن في الميه
بواسطة بواش وقواضي أجواديه
حتين فكة الخمسين مع الحريه
عنقها ريل وبرطامة بذه ضحويه
كفيتا خيل عيونها قنابلاً ذريه
دارت وجهك القمر المنازل أب ريه
حاجبك نون وإيديك حكمه ربانيه

بت العايدي زعلت زعل شديد خلاص !!!!
قالت إفتح الله من الكلام ده أنا المنصب ختوني فيهو شعوب وبي وراي ناس ومناصرني كيف تدوا الجنه سبعين في الميه ؟؟
قلنالا يابت العايدي الجنه دي جابها الشعب بالإنتخابات
بت العايدي قالت الشعب ده كترة قوش ساي الحطابي بصوت والفحامي بصوت والنشال بصوت و الليه حق التصويت والماليه بصوت!!!!!!!
بت العايدي قالت نطرح صوت الثقه بيني وبين الجنه إن أداها الحكم هيلها وإن ما أداني أنا كمان أمري لله
وطرحنا صوت الثقه بين العايديه والجنه والثقه فوزت بت العايدي

وقال فيها :

الدولة المعاضه للحكومات رازت
بت العايدي طرحت صوت صراحها وفازت
درعات عنز الريل المشامشة وجازت
أخدت كاس وكسرت قول وكتلت وازت

الجنه قالت إفتح الله من الكلام ده أنا جابتني الإنتخابات وغالبيه
قلنا ندخل فيهن يعني جوديه
قلنالا يا الجنه إنتي الله خلقك سمحه تشكلي فوق سماحتك دي , وتخلي بت العايدي تحكم أكبر منك عمر وأعلم منك في المواد والقانون .

وقلنا نشكر الجنه في سماحتا

فمك وخدك ومايقك وجتو محكوره دايتو
رقبة جنه باهيه وديسك النص فايتو
بين شفتيك لزيز قولاً مشكه أيتو
جنه سبيب أكتافا منهدلات
وإيدين جنة جدلة قايد الظبات
جنه صدرها شايل ليه رمانات
جنه الفيها أوصاف السماح تامات
جنه العندها العز والخيول عارضات
جنة فتينة المرقن علي السبعات
عاليه ضميرا طي حجبات
تبريك فيه ذي نقش الكتب بالذات
سمحه سماحه ما سمع بيهو في السابقات
تاجوج وزبيده زليخه في الشيخات
سيقان جنه روسمان قاطع العوجات
وأقدام جنه ليف لا هن أفتتكر لينات
عاشق جنه قنب تعتري الحالات
نظر حنه أنفع من دواء وبخرات

وإتفقن علي الأمر هذا
بعد ما إستتب الأمن في فترة حكم العايديه ومستشارتها الجنة وكان عهدهن عهد أمان وسلام والأمل إتحقق !!!!!!
نحن سامعين قالو إنو حايكون في إنقلاب أبيض يعني مافي جوطه ولا سفك دماء ولاترويع للموطنين لا لوعة لايحزنون !!!
الإنقلاب بمساعدة طابور خامس وتواطوء من أجهزة إستخبارات بريدة وقوات دفاع ود أب شام وبمساعدة لواء محمول جواً من تمبول كتيبة مشاه متحركه من الغسيناب
وكتبة مدرعات عيون تجنن من رفاعه والحصل حل والناس تستكين للأمر الواقع
وربنا إولي من يصلح بس مافي أي خساير غير بعض الحسرات والزكريات الجميله مع بت العايدي والصفا وجلسات الأنس معاهن زكريات بقت لينا مؤلمه
لكن الأمر لله من قبل ومن بعد ونحن نسلم قلوبنا وعقولنا بس ما لينا حجه تاني !!

أصبح البيرك مرفوع في بريده .. يا ناس الحاصل شنو ؟؟؟؟؟؟؟؟؟
قالو إنقلاب بنات الحكومة قلبتا الصفا
يا ناس القلب الحكومة دا كان وين من زمان ؟؟؟؟؟؟
قالو كان في و مختفي وداير إظهر إمكانياتو وإيجي إحكم
الشعب غير نعم ما عندو حيله
قلنا نمشي نأييد ونبارك ونشوف الرئيس القلب الحكومه دي ونهنئ

قال :

إتشرفنا بوجود الرئيس في بريده
الصفا خاصه يابلال قولي فوقا قصيده
عرافت المعاني الفي السؤال مي بليده
ملكة جيل عطرها وحاكمه فيهو فريده
إتشرفنا بوجودو ولبس دبوره
لوناً ستو من أحوار عدن معزوله

سموك عافية الأبدان وشلخك وارد
بي الزوق والحداقه ودمك المو بارد
كلسك لي قلوب العاشقنك هارد

أقول مشتولة الهرف النجح خوليها
ولا لتيبة القيقي الزرق شاتيها
الخيل والوحش ما بمثلوهو عليها
تشبه ليلة القدر البيدعو فيها

وإستلمت الصفا الحكم لفتره طويله جداً والأمل فيها إتحقق
وكان عهدها عهد تنميه ورخاء والبطانه بقت خضراء
والمويه جاريه وكتر الخير والمطر وأردب العيش بقي مجان

لكن جاء واحد إسمو حسان جاها زياره وشرب عندها جبنه
ورصاها ليك عين وعينو معرف عنها أسرع من الرصاص
معروف عينو حاره تنزل الحديه من السماء


طبعاً زي ما قلت ليكم جاء حسان عند الصفا وشرب عندها قهوه وهو مرق بجاي هي قرصت بي جاي قرصا دابي
الناس الحواليها قالوا حسان سحرها
لكن هي عندها مشية براها كاتلاها
إن جاتك مارقه من بيت لي بيت تطريك حصان يوسف ود الشيخ عمارة
وهسع القرصه بقت لينا شئ مؤلم خالص وتألمنا لألما شديد خلاااااااااص

وقلنالا

الدعت المرق من الوغر الطقاك إنجيها منو سيد المسجد أب رايات
تاتاي المخمس في الزمان الفات سيتي براكي مكلوفة شماليات
(تاتي المخمس يعني مشي الحصان )
أكان الشئ بكون بخاطر الإنسان طعنة شوكة ما تجي لي عناق بوجان
الدعت المرق من وقرت الحيشان
إنجيها منو بدوي وأشقر أم ضبان
راجل كسلا عووووووك يالمرغني أب عثمان
وود تكتوك فرح والشيخ هجو أب قران
عين العركة تسكن سابع النيران
كتلها مشيها حسان أصلو مو غلطان
(والحمد لله بعد الدعوات دي ربنا عافاها منو وبقت طيبة)
=================================================


أكان العرب نازلين في مكان ..وجا احمد ود عوض الكريم والصادق من البريسي..والوطا صباح ..والصادق حلب شدوقو في العرب كورك:اروروروووك..علي طول حسو..
وكل زول شال سيفو وجوا جارين قايلين في مشكلة ..
يا زول الحاصل شنو؟؟
قالهُن: حرّم عوجة مافي ..الجملُو قريب يشِد ..
شنو ؟؟
قالهُن "وزنين" فتوها في "القِليتة" .. نمشي نشوف هي ماسكة درب القِداما والله سوّتلها راي براها..
وهسع الحقيقية الجملو قريب كلو شدّا ..
قيّلوا في الصُباغ وإتراوحو في ريرة ..وباكر الضِحى جوا عِندها..
قدُر ما شافت الرَكُب ماشي علي البيت..وكان نازل في بيتا عبد اللهِ ود شوراني شبّحت البيت زادتو..مرقت علي الجُمال دلّت البِتقدرها..
والكيف جبنة بس ..
وجابت الموية اسقتُن ..وولعت الفحم يتهوزز مِتِل مَغس اللقربين ..وإشتغلت علي الجبنة ..
وهسع ختت الفناجين متل وليدات الفَصُل ..ومَلتِن على قدر المجتمع.

أحمد ود عوض الكريم قال : في حُكمُ مَجلَس : المابجيب غَنوة فوق "وزنين" دي ما يشيل فنجانو..
قالولو : غن آ شيخ أحمد..
قال: لا ..السابقك علي الباب قولو يا أرباب ..هو فرض يغني ود شوران دا ..
ود شوران قالُو: الغُنا فوق وزنين دي؟؟
قالُو فوق وزنين دي ..
قالي:
سـمحة وضوقها لبن صهباء ودخلها مبسّط
شرفتا رِيل وكفيتا خيل وطُولها موّسط
من تاتاي قدومها وخطوتا الإنرصت
حسيت قلبي فارقني وكبِدتي إنقصت
دا ود شوران.
ادتو فنجانو .
وإتلفتت على الصادق كشمت.
الصادق قالها:
لحظ ابصارو حتى اللحظة لي بصّاها
فرّا فواطرو تمرة فؤادي كع قصّاها
قدر ما اقول يطول الون علي أنساها
مجلوقةً تقبّض في البدن داساها


احمد عاين عليها هي ..
قاليها:
شماليقك نُضاف وصباكي ناقِع ماها
رُوبتِك قامِتك المربوعة تب قاسماها
جميل جِيدك مسجل والعقول لاسماها
دعجات خد وفادعاً في البهيم باسماها


وداهو علي بلة ود اب شُكُر.. قالُو:
نفسي الخاينة ابت الزاد وطريّت كيفا
هادي قصبة سقادي الموجا كاضم قيفا
معشوقتي الجميلة وديسا هدلو كتيفا
ركفة شام ظُرة وسمحة دهبة ومُهرة فُلوة وديفا

جادين ود المهيوب قاليها:
شرقان في جمالك وغلّبني اوصافك
وفيك جُملاً تمتع كل راوٍ شافك
الفارس اللِبس درع الدويدي بخافك
مايقك عين جدي ودوف أم لبب في اردافك

أمُحُمّد ود الفكي حمد قاليها:
سَماحِك غير حِبُوب بَرتا وقفِيس حُجّاج
سماح اليبست دوف الطريفي الساج
شِعاع ظُرر الغشيم الفي الظلام وجّاج
سماح الفرُوا براق السِـرا الفجّاج

خالد ود علي قاليها:
لِسَان باهي الوريد المُو شرِف هراج
هُدود الصي عيون الغافي في السهراج
تفرذ زمهريراً في العضُم تلاج
يحل عُقد الضماير بسمها الفلاج



ود شعيت قال:
سنهُور حاكم الدولة اب سِلاحاً راج
ماخدة عليهو دبورتين علاوة وتاج
دَرعات عُنّز الريل السماهِن هاج
طال حسر العليهُن ختت الإسلاج

الصِدّيق ود عباس قال :
جمال معشوقتي أبداً في البلد مافِيش
جمالاً خِلقة غير عَدلة لَباس وغشيش
ديفة المرّحن بين ود قِدير وكشيش
جمالك فرضة والتانيات معاكي عويش

كرار ود كُردُم قالو:
يا الصِدِيق عشوقي الكتفو هدلو الريش
مضروب الغرام قال الحكيم ما بعيش
قبلي أم درعة بدري وصيدت في الديش
كتير الترّكتلُو كتابو وكَتر الهيش


رانفي ود اللافِض قال:
عشوقتي كحيلة الرُميش
أديبة وراسية مي ام لكعة المشيها رشيش
جرحها نازي دافِق دم فؤادي بشيش
درعاء و للكُلوهات جوز قُمارها دِشيش

عبد الله ود الفكي الصديق ود اب ناجمة قال:

ناس رانفي بِنُوحوا مقربنين وعطيش
انا مالي؟ مِحارب النوم ومابي العيش
عاشقي الجرحو كاتم دمو ما في بشيش
خلااس داركني ..عِلا الليهو قشة بعيش


احمد كيتا الهدندوي قال "إيداييب كُلها" :
بي شلاخ واب رشمة
كريكناب هاب للي ليما وتِكنِشما
الخلاني اكسر التوبة وين ما أطرا
انا قريت تيكا ما جلسو الارام لما

سليمان الهدندوي قال:

يا قلبي الوليد مالك بقيت تشلا
قال من شوفة اللابس رهيف ومدلا
علي المربوعة قامتو وما الطويل ومخلا
سواي حاكا دهنوك السنوك الولا

عيد ود الشيخ عبد الله الزبيدي قال:

نحنا أولاد رشيد الخاصة بالدرهان
نحنا أهل الدعيلات ما بنسعى الضان
ننصب لها رايش نحنا نسكها بالسفهان
=========================================

رَحَل اللبَّسِك هيبَة و دِوِيدِي و تاج
شاعر بادية لي ورقة وقلم ما إحتاج
هجّام غايِس البرقْ أب سِحاباً قاج
سيف شُكرية لي هامة الخَسِيم دهَّاج
راكِب العاصي في القُبَس النجِمها سراج
طامِح صدرو مانِع لَصَة الكُرباج
عانِي المِنُو نبضات القَلِب نَسَّاج
ما بننساهو لمَّت نَدخُل النفَّاج
هكذا رثاه الشاعر ( ود الراوي)، في اعتقادى أن ود شعيت هذا لو وجدت أشعاره من التناول والشهرة ما وجدته أشعار الحاردلو، لتحصلنا على مادة دسمة وشعراً بليغاً، لا يخلو من الحكاوي والمشاهد الدرامية المليئة بالجمال.وكذلك الحال عند غيره من شعراء البطانة المغمورين.او الذين إكتفوا بالتناول الشعبي والإنتشار بين جمهورهم أكثر من الباحثين والمهتمين بالتراث.
منقول من عدة مواقع للتعريف بهذا الشاعر الفذ
د. بله

_________________
بطانه أهل النفل وكت الوجـوه تتضـرب
وركازة العشيـر وكـت السنيـن تتكـرب
لا تقولى لى زمنك فـات ونجمـك غـرب
مليون فيكى فارس خيـل وجـدو مجـرب
الرجوع الى أعلى الصفحة اذهب الى الأسفل
أحمد التاي العوض
عضو نشط
عضو نشط


عدد المساهمات: 51
تاريخ التسجيل: 28/11/2010
العمر: 53
الموقع: السعودية - مدينة الهفوف

مُساهمةموضوع: رد: ملامح من اعمال شاعر البطانة ام هبج فى محاولة تحتاج لكثير من التوثيق والمراجع   الإثنين ديسمبر 23, 2013 3:31 am

أبدعت يا د. بله والله أول مرة اقرأ هذا السرد الجميل والرائع عن شعراء البطانة وعلى رأسهم فخرنا ود شعيت فقد كان مدرسة متفردة في الشعر الرصين والشعر الهزلي وشعر المناسبات كما أنه كان من المحبين والغيورين على على بطانة شكير وفعلاً لو وجد التوثيق والإهتمام المناسب لتربع على عرش شعراء البطانة القدامى والجدد ... لك تحياتي ... وما تحرمنا من مثل هذه الدرر
الرجوع الى أعلى الصفحة اذهب الى الأسفل
 

ملامح من اعمال شاعر البطانة ام هبج فى محاولة تحتاج لكثير من التوثيق والمراجع

استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

 مواضيع مماثلة

-
» برنامج تدريبي علي اعمال الكنترول
» تعريف كرت الصوت ac97 للبرده فوكس كون والmsiوعامه لكثير من البرد
» اخر اصدار من تعريف كارت الصوت realtek AC97
» برنامج تعريف كرت الصوت - Realtek AC97 Audio Driver 4.05
» اخر اصدار من تعريف كارت الصوت Realtek AC97

صلاحيات هذا المنتدى:لاتستطيع الرد على المواضيع في هذا المنتدى
منتدى ابناء قبيلة الشكريه ::  :: -