كلو الحى بجيهو الشيب وعمرو بروح
وهى بعودته الشباب وين البرق مايلوح
بتحنن جديد شابه وعطرها يفوح
حسيرها بنونى ذي الفاقد المجروح
@@@@@@
برق البازه والقبلى اب رعيدآ كره
ردعنك سوآ ومرقن خزاينك بره
نعمك قلب الهبجة وهنونك فره
فرسانك بدفرو الدنقلاوى اب غره
@@@@@@
انفجرت تعولك وقاسك الوبال
ردعك مغرباوى وهجعة برقك شال
عربك شالوا فوق زملا مضى وفيال
مع الحمريب دعاشك جابلو ريحة نال
@@@@@@@
خرفتى وقبايلك ركبت ديرانك
بقر البلعلاب وردن تبوب وديانك
نسيم المغرباوى الكس فوق عربانك
دعاش حمريب ضهور والنال مع ريحانك
@@@@@@
خرفتى وطلايعك للمراتع لفن
ضعاينك شيلن من المدامر وقفن
وديانك مشن ليهن سبوع ماجفن
وقبليك تور الركمى السحابو مدفن
@@@@@@@@
يابطانة على الكسر الحصان وتيم
جوك حركو القبلى وسحابو اتليم
برقك شال ونيلك فوق جبالك خيم
صعيدك نفض المزره ونهارك غيم
@@@@@@@@
حليل البردوك بى حصان ودرعآ صاين
حليل زمنآ طرايدك يالمرية رواين
حليل عربك قبيل وكتين بقوموا ضعاين
ودبعشوم ترك فى البافليلة خزاين
@@@@@@@@
حليلك يا ام هبج زمنآ سخية مطورك
خرفتى وطلايعك شربتن لى دورك
سيل البارد ادنو المهاوى ضهورك
واديك انحدر منع الطريق لادورك
ونواصل