البطانه تشتكي اهلها
عبد الله ود الشريقاوي من اروع شعراء البطانه في الجيل الحديث وهو حفيد شعراء وفراس من قبيلة الشكريه جدو ود حسب الله وهولايقل عن كبار شعرا البطانه من امثال الحاردلو والصادق وغيره وهذه المحاوره بينه وبين البطانه في جبال ريره احببت ان اكتبها لكم اتمنى ان تعزروني ان كان هناك خطاء في ا لكتابه
ذكر انه جاء في قلعات ريره وحسه انو البطانه ناكره الناس الفيها وقال جاتني ايد الحداراب وقالت لي:
قالت دايره زماني الوله
بدور العمري ما خلوني ضقت الزله
وين احبابي وين سيد عمري ود حسب الله
وينو الاشول المن الضيوف ما كله
اتلفت على الجبال قلت ياجماعه الايد دي ضغيره والكلام دا مو منها لازم جاي من محلا اكبر منها قلت :
قلعات ريره حزنانات ويبكي جمادتِن
لامني وطرن عوض الكريم الفاتِن
بعد زمن الصمود تحت السحاب الهاتِن
شكن جور السنين الشرطن قمشاتِن
اجارحتي ياريره وصمودك فاتو
صافين الضراع البكضب ماجاطو
تارخك مسجل عندي بأسباتو
ضيمه وزله ماضقتيها لامن ماتو
قالتي ريره وين اسيادي وينو شرفّن
وين الشالو عادمين المقود في طرفّن
بديت احكالها لكن قبل ما اوصفّن
قاتلي جوني ناسن كت مابعرفّن
قت ليها جبتيلك سؤالا منودايره اجابه
ديمه تكوسي ليوم الدمي وكسابه
اكان اتلاشت المحله وبديتي حرابه
فرسانك بجوك فوق البعيط واتشابه
تاريخك سيوف مابكتبوهو كتابه
خيولن غُر وشكريتن عزازانسابه
بطانتن تقول جرتق عروس اعشابه
مابتعرف عشيرُن كلو يمه ويابه
قاتلي وين رجالي وين اسود الغابه
فرسان الصدق ماببقو فيّ سبابه
وين زمن المعزه الكنت فيهو مُهابه
وين اهلي السيوفن في الملاقي جدابه
قت ليها اهلك يا ام هبج ساده ونمور وضرغم
ساعة شنيو ما سمعنالنا زول اتنغم
اكان جاطت بواديك والنحاس اتنغم
الكون كلو للمابينا ببقى ملغم
قاتلي سيبني بعد اصبح هميله وزايعه
ببكي رجال وببكي على الليالي الضايعه
فاقده تشلع الخود بالسيوف الضايعه
فقت اهلي اللقاهم كالاسود الجايعه
قتليها رجالك ياام هبج بوريك نفايلالاهولهن
عُزاز قيمان وصابره على الملاقي خيولهن
اهلي المن صناديد الصحابه وصولهن
هدمو وجابو لشيل التقيل زهمولهن
قاتلي وين رجالي الكنت هيلهن بُرد
وين الامنوها وطاتي طولن وعرض
وين صقري البيسكل فوق هدومي المرد
وين دمعي التكاكر والخيول الجرد
قتليها رجالك حاضره ما تتضيمي وتنعلي
ولا تحكيلي بالماضي الزمانو مولي
انزعي توب حدادك وللرقيص انحلي
قاعدين فيك رتوتا ظرفهم مابجلي
قاتلى فاقده سيافي وخيولي الغُر
فاقده مدابك العنج اللقاهم مُر
الجودن بزيد بعد السنين ماتجُر
عقبوني الصبرو على المحن والضُر
قتليها زمن سيفك بيكلح والحديد بتفقل
كم كم فيك عريس امات لبوس اتهقل
يا ام فارسا بلاطم وبالدويدي متقل
الماعندو فيك تاريخ اخير اتعقل
قاتلي ديمه بالخير لي بقيت بتبشر
ببكي رجال ومالا بالعسينه مدشر
ببكي السيفو قاطع وصفو ماهو مهشر
ببكي البرمو وفي الملاقي بكشر
مساحتك واسعه فيك وديان وفيك سهول
نباتك افوفي كل ما يرقعنو تعول
الا حسبتي يا الوافره العطاك مبزول
واليتينا بترابا كتير ومحول
قاتلى وينن اهلي الطبعهن مقبول
ومعروطن عتيم ما يكرموه بالفول
قبال الثقافه وسكنت الحلول
كم لله لابسين قفره بالشملول
الجمعة أكتوبر 23, 2015 9:36 am من طرف 
